وکلا میرے ہاتھ مضبوط کریں، عدلیہ سے کرپشن ختم کردیں گے، چیف جسٹس افتخار چوہدری

اسلام آباد (نمائندہ جنگ) چیف جسٹس آف پاکستان مسٹر جسٹس افتخار محمد چوہدری نے کہا ہے کہ وکلاء میرے ہاتھ مضبوط کرے، عدلیہ سے کرپشن ختم کردی جائیگی، عدلیہ کے ادارے میں کرپشن ہرگز برداشت نہیں کی جائیگی۔ عدلیہ کا ادارہ میری ذمہ داری ہے۔ انہوں نے سپریم کورٹ میں وکلاء کی رجسٹر پر دستخط کرنیکی تقریب کے دوران وکلاء پر زور دیتے ہوئے کہا کہ اگر ان کو اس بارے میں کوئی شکایت ہو تو وہ اس کی نشاندہی کریں میں آپ کو یقین دلاتا ہوں کہ وکلاء کے تعاون سے ہی کرپشن کا خاتمہ ہو گا۔ وکلاء اپنی صفوں میں ایسے کرپٹ عناصر کو برداشت نہ کریں جو کہ عدلیہ کی بدنامی کا باعث بنتے ہوں ایسے وکلاء کے بارے میں بار کونسلوں کو شکایت کی جائے یا سپریم کورٹ سے رجوع کیا جائے۔ میں خود بار کونسلوں سے بات کرونگا۔ انہوں نے کہا کہ وکلاء نے جس طرح دو سال تک عدلیہ بحالی کی تحریک چلائی ہے۔ اسی طرح بدعنوانی کے خاتمے میں بھی ہمارا ساتھ دیں۔ ایسا وقت آئیگا جب بدعنوانی کا ایک کیس بھی باقی نہیں رہے گا۔ تاہم آپ کی شکایتیں ٹھوس ثبوت پر مبنی ہونی چاہئیں۔ انہوں نے کہا کہ آرٹیکل 37 ڈی کے تحت شہریوں کو سستا اور فوری انصاف فراہم کرنا ریاست کی ذمہ داری ہے۔ انہوں نے نئے دستخط کرنیوالے وکلاء سے کہا کہ آپ کو دس پندرہ سال کی وکالت کے بعد سپریم کورٹ کا وکیل بننے کا اعزاز حاصل ہوا ہے میں آپ کو یقین دلاتا ہوں کہ جن مشکلات کا سامنا کرنا پڑا اب ایسی مشکلات نہیں آئیں گی۔ سپریم کورٹ میں آپ کو صاف ستھرا ماحول ملے گا اور آپ خوش و خرم واپس جائینگے۔ تاہم ریلیف صرف میرٹ پر ملے گا۔ وکلاء اپنے کیس تیار کر کے عدالتوں میں پیش ہوں۔ سپریم کورٹ کا لائسنس ملنے کا مطلب یہ نہیں کہ آپ ماتحت عدالتوں میں پیش نہ ہوں آپ کی کوشش ہونی چاہئے کہ لوگوں کو سستے انصاف کی فراہمی کیلئے اس عمل میں عدلیہ کی معاونت کریں اور مقدمات میں زیادہ التواء نہ مانگیں۔ بار اور بنچ کے تعاون سے مقدمات کو جلدی سے نمٹایا جا سکتا ہے۔ انہوں نے کہا کہ ہم اس سلسلہ میں خط بھی لکھ رہے ہیں تاکہ وکلاء مقدمات کو تیزی سے نمٹانے میں تعاون کریں۔عدالت عظمیٰ کے وکیلوں کی حیثیت سے جن وکلاء نے سپریم کورٹ کے رجسٹر پر دستخط کئے ان میں ثمینہ خان، انیس الحق ملک، ارشد جاوید، چوہدری زبیر احمد فاروق، حبیب احمد، سیّد سعید الدین ناصر، محمد صادق لغاری، فیض الله گورائیہ، شوکت علی شیخ، محمد اقبال کلہوڑو، سردار اکبر گجر، محمد وقار، غلام شبیر شاہ، محمد ندیم قریشی، ثناء الله نور غوری، لبنیٰ پرویز، ڈاکٹر طارق حسن، ظفر احمد خان، سلیم اختر برڑو اور انجم غنی خان شامل تھے۔ قبل ازیں رجسٹرار سپریم کورٹ ڈاکٹر فقیر حسین نے خطبہ استقبالیہ پیش کیا۔

__________________
MUHAMMAD FURQAN LATIF CH.

QUICKLINX
WIRELESS

House# 341, Block-H, Hazrat Usman Street, Sabzazar Scheem, Multan Road, Lahore.

Tel: 042-37495200, Fax: 042-37495200, Cell: 0321-848 4454