Ahmad Faraz Poems Collection
Aankh se door na ho dil se utar jaayegaa
AaNkh se door na ho dil se utar jaayegaa
Waqt kaa kyaa hai guzarataa hai guzar jaayegaa
Itanaa maanuus na ho Khilvat-e-Gam se apanii
tuu kabhii Khud ko bhii dekhegaa to Darr jaayegaa
tum sar-e-raah-e-vafaa dekhte reh jaaoge
aur vo baam-e-rafaaqat se utar jaayegaa
zindagii terii ataa hai to ye jaanevaalaa
terii baKhshiish terii dehliiz pe dhar jaayegaa
Doobte Doobte kashtii to ochhaalaa de doon
main nahin koii to saahil pe utar jaayegaa
zabt laazim hai magar dukh hai qayaamat kaa 'Faraz'
zaalim ab ke bhii na royegaa to mar jaayegaa
Ab ke ham bichhre to shaayad kabhii khvaabon mein milen
ab ke ham bichhre to shaayad kabhii Khvaabon mein milen
jis tarah suukhe hue phuul kitaabon mein milen
Dhoond ujare hue logon mein vafaa ke motii
ye Khazaane tujhe mumkin hai Kharaabon mein mile.n
tuu Khudaa hai na meraa ishq farishton jaisaa
dono insaan hain to kyon itane hijaabon mein milen
Gam-e-duniyaa bhii Gam-e-yaar mein shaamil kar lo
nashaa barhta hai sharaben jo sharaabon mein milen
aaj ham daar pe khenche gaye jin baaton par
kyaa ajab kal vo zamaane ko nisaabon mein milen
ab na vo main hooN na tu hai na vo maazii hai `Faraaz',
jaise do shaKhs tamannaa ke saraabon meim milen
ab ke rut badlii to Khushbuu kaa safar dekhegaa kaun
ab ke rut badlii to Khushbuu kaa safar dekhegaa kaun
zaKhm phuulon kii tarah mehakenge par dekhegaa kaun
dekhnaa sab raqs-e-bismal mein magan ho jaayenge
jis taraf se tiir aayegaa udhar dekhegaa kaun
vo havas ho yaa vafaa ho baat mehroomi kii hai
log to phal-phuul dekhenge shajar dekhegaa kaun
ham chiraag-e-shab hii jab thehre to phir kyaa sochna
raat thii kis kaa muqaddar aur sehar dekhegaa kaun
aa fasiil-e-shahar se dekhen Ganiim-e-shahar ko
shahar jalataa ho to tujh ko baam par dekhegaa kaun
ab k tajdiid-e-vafaa kaa nahin imkaan jaanaaN
ab ke tajdiid-e-vafaa kaa nahin imkaaN jaanaaN
yaad kyaa tujh ko dilaayeN tera paimaaN jaanaaN
yuN hii mausam kii adaa dekh ke yaad aayaa hai
kis qadar jald badal jaate hain insaaN jaanaaN
zindagii terii ataa thii so tere naam kii hai
ham ne jaise bhii basar kii teraa ehsaaN jaanaaN
dil ye kehtaa hai k shaayad ho fasurdaa tuu bhii
dil kii kyaa baat karen dil to hai naadaaN jaanaaN
avval-avval kii muhabbat ke nashe yaad to kar
be-piye bhii tera chehraa tha gulistaaN jaanaaN
aaKhir aaKhir to ye aalam hai ki ab hosh nahiin
rag-e-miinaa sulag uthi k rag-e-jaaN jaanaaN
muddaton se ye aalam na tavaqqo na ummeed
dil pukaare hii chalaa jaataa hai jaanaaN jaanaaN
ham bhii kyaa saadaa the ham ne bhii samajh rakhaa thaa
Gam-e-dauraaN se judaa hai Gam-e-jaanaaN jaanaaN
ab k kuchh aisii sajii mahafil-e-yaaraaN jaanaaN
sar-ba-zaanuu hai koi sar-ba-girebaaN jaanaaN
har koi apni hii aavaaz se kaaNp uthtaa hai
har koi apane hii saaye se hiraasaaN jaanaaN
jis ko dekho vahii zanjiir-ba-paa lagtaa hai
shehar ka shehar hua daaKhil-e-zindaaN jaanaaN
ab teraa zikr bhii shaayad hii Gazal men aaye
aur se aur huaa dard kaa unvaaN jaanaaN
ham ki ruuthii hui rut ko bhii manaa lete the
ham ne dekhaa hii na thaa mausam-e-hijraaN jaanaaN
hosh aayaa to sabhii Khvaab the rezaa-rezaa
jaise urrate huye auraaq-e-pareshaaN jaanaaN
ab naye saal ki mohalat nahin milne vaalii
ab naye saal kii mohalat nahin milne vaalii
aa chuke ab to shab-o-roz azaabon vaale
ab to sab dashnaa-o-Khanjar kii zubaaN bolate hain
ab kahaaN log muhabbat ke nisaabon vaale
zindaa rehne ki tamannaa ho to ho jaate hain
faaKhtaaon ke bhii kirdaar uqaabon vaale
na mere zaKhm khile hain na teraa rang-e-hinaa
mausam aaye hi nahin ab ke gulaabon vaale
aise chup hain ke ye manzil bhii kaDii ho jaise
aise chup hain ke ye manzil bhii kaDii ho jaise
teraa milna bhi judaai ki ghaDi ho jaise
apane hi saaye se har gaam laraz jaataa huuN
raaste mein koi diivaar khaDi ho jaise
manzilen door bhi hain manzilen nazdik bhi hain
apne hi paaon mein zanjir paDii ho jaise
kitne naadaan hain tere bhulane vaale ke tujhe
yaad karne ke liye umr paDii ho jaise
aaj dil khol ke roye hain to yuuN Khush hai 'Faraz'
chand lamhon ki ye raahat bhii baDii ho jaise
badan mein aag si chehraa gulaab jaisaaa hai
badan mein aag si chehraa gulaab jaisaaa hai
ke zahar-e-Gam kaa nashaa bhi sharaab jaisaa hai
kahaaN vo qurb ke ab to ye haal hai jaise
tere firaaq kaa aalam bhii Khvaab jaisaa hai
magar kabhi koi dekhe koi paDhe to sahii
dil aainaa hai to chehraa kitaab jaisaa hai
vo saamne hai magar tishnagii nahiin jaatii
ye kyaa sitam hai ke dariyaa saraab jaisaa hai
'Faraz' sang-e-malaamat se zaKhm zaKhm sahi
hamen aziiz hai Khaanaa_Kharaab jaisaa hai
barason ke baad dekhaa ik shaKhs dil_rubaa saa
barason k baad dekhaa ik shaKhs dil_rubaa saa
ab zehan mein nahin hai par naam tha bhalaa saa
abruu khinche khinche se aaNkhen jhukii jhukii sii
baaten rukii rukii sii lahjaa thakaa thakaa saa
alfaaz the ke jugnuu aavaaz k safar men
ban jaaye jangalon mein jis tarah raastaa saa
Khvaabon mein Khvaab us ke yaadon mein yaad us kii
neendon mein ghul gayaa ho jaise ke rat_jagaa saa
pahle bhi log aaye kitne hi zindagii mein
vo har tarah se lekin auron se tha judaa saa
aglii muhabbaton ne vo naa_muraadiyaaN din
taazaa rafaaqaton se dil tha Daraa Daraa saa
kuchh ye ke muddaton se ham bhi nahin the roye
kuchh zehar mein bujha tha ahbaab ka dilaasaa
phir yuuN hua k saavan aaNkhon mein aa base the
phir yuuN hua k jaise dil bhii thaa aablaa saa
ab sach kahen to yaaro ham ko Khabar nahiin thi
ban jaayegaa qayaamat ik vaaqiaa zara saa
tevar the beruKhii k andaaz dostii k
vo ajanabi tha lekin lagtaa thaa aashnaa saa
ham dasht the ke dariyaa ham zehar the ke amrit
naahaq thaa zoNum ham ko jab vo nahin tha pyaasaa
ham ne bhi us ko dekhaa kal shaam ittefaaqan
apnaa bhi haal hai ab logo 'Faraz' kaa saa
beniyaaz-e-Gam-e-paimaan-e-vafaa ho jaanaa
beniyaaz-e-Gam-e-paimaan-e-vafaa ho jaanaa
tum bhi auron ki tarah mujh se judaa ho jaanaa
main bhi palakon pe sajaa luuNgaa lahuu kii buuNden
tum bhii paabastaa-e-zanjiir-e-hiinaa ho jaanaa
Khalq kii sang_zanii merii Khataaon ka silaa
tum to maasuum ho tum door zaraa ho jaanaa
ab mere vaaste tariyaq hai ilhaad kaa zehar
tum kisi aur pujaarii k Khuda ho jaanaa
chheDe main ne kabhi lab-o-ruKhsaar ke qisse
chheDe main ne kabhi lab-o-ruKhsaar ke qisse
gahe gul-o-bul_bul ki hikaayat ko nikhaaraa
gahe kisii shahazaade ke afsaane sunaaye
gahe kya duniyaa-e-paristaaN kaa nazaaraa
main khoyaa rahaa jin-o-malaik ke jahaaN men
har lehjaa agarche mujhe aadam ne pukaaraa
barason yuuN hi dil_jamii-e-aurang kii Khaatir
sau phuul khilaaye kabhi sau zaKhm Kharide
main likhtaa rahaa hijr baGaavat manshuun ki
main paDhtaa rahaa qasr_nashiinon ke qaside
ubhraa bhi agar dil men koi jazabaa-e-sar_kash
is Khauf se chup thaa ke koi honTh na si de
lekin ye tilismaat bhi taa der na rah paaye
aaKhir mai-o-miinaa-o-Daf-o-chang bhi TuutTe
yuuN dast-o-garebaaN hua insaan-o-Khudaaband
nakhachiir to taDape qafas-e-rang bhi TuuTe
is kashmakash-e-zarraa-o-anjum kii fizaa mein
kash_kol to kyaa afsar-o-aurang bhii TuuTe
main dekh rahaa tha mere yaaron ne baDhakar
qaatil ko pukaaraa kabhi maqtal ko sadaa di
gahe rasn-o-daar ke aaGosh men jhuule
gahe haram-o-dair kii buniyaad hilaa di
jis aag se bhar_puur thaa maahaul kaa siinaa
vo aag mere lauh-o-qalam ko bhii pilaa di
aur aaj shikastaa huaa har tauq-e-talaaii
ab fan mera darbaar ki jagiir nahiin hai
ab meraa hunar hai mere jamahuur ki daulat
ab meraa junuuN kaif-e-taaziir nahin hai
ab dil pe jo guzaregii be-Tok kahuuNgaa
ab mere qalam main koi zanjiir nahin hai
dil bhi bujha ho shaam ki parachhaaiyaaN bhi hon
dil bhi bujha ho shaam ki parachhaaiyaaN bhi hon
mar jaaiye jo aise mein tanhaaiyaaN bhi hon
aaNkhon ki surKh lahar hai mauj-e-suparadagii
ye kyaa zaruur hai ke ab angaDaaiyaaN bhi hon
har husn-e-saadaa lau na dil mein utar sakaa
kuchh to mizaaj-e-yaar mein geharaaiyaaN bhi hon
duniyaa ke tazakire to tabiyat hi le bujhe
baat us ki ho to phir suKhan aaraaiyaaN bhi hon
pehle pahal ka ishq abhi yaad hai 'Faraz'
dil Khud ye chaahtaa hai ke rusvaaiyaaN bhi hon
dost ban kar bhi nahin saath nibhaanevaalaa
dost ban kar bhi nahin saath nibhaane-vaalaa
vahi andaaz hai zaalim kaa zamaane-vaalaa
ab ise log samajhate hain giraftaar meraa
saKht nadiim hai mujhe daam mein laane-vaalaa
kya kahen kitne maraasim the hamaare is se
vo jo ik shaKhs hai muuNh pher ke jaane-vaalaa
tere hote hue aa jaatii thi saari duniyaa
aaj tanhaa huuN to koi nahin aane-vaalaa
muntazir kis kaa huuN TuuTii hui dahaleez pe main
kaun aayegaa yahaaN kaun hai aane-vaalaa
main ne dekhaa hai bahaaron mein chaman ko jalate
hai koi Khvaab kii taabiir bataane-vaalaa
kyaa Khabar thi jo meri jaan mein ghulaa hai itnaa
hai vahi mujh ko sar-e-daar bhi laane-vaalaa
tum taqalluf ko bhi iKhalaas samajhate ho 'Faraz'
dost hotaa nahin har haath milaane-vaalaa
dukh fasaanaa nahin ke tujh se kahen
dukh fasaanaa nahin ke tujh se kahen
dil bhii maanaa nahin ke tujh se kahen
aaj tak apani bekali kaa sabab
Khud bhi jaanaa nahin ke tujh se kahen
ek tu harf_aashnaa tha magar
ab zamaanaa nahin ke tujh se kahen
be-tarah dil hai aur tujh se
dostaanaa nahin k tujh se kahen
ai Khudaa dard-e-dil hai baKhshish-e-dost
aab-o-daanaa nahin ke tujh se kahen
Faraz' ab koi saudaa koi junooN bhi nahin
Faraz ab koi saudaa koi junooN bhi nahin
magar qaraar se din kaT rahe hon yuuN bhi nahin
lab-o-dahan bhi milaa guftaguu ka fan bhi mila
magar jo dil pe guzaratii hai kah sakuuN bhi nahin
meri zubaaN ki luknat se bad_gumaaN na ho
jo tuu kahe to tujhe umr bhar miluuN bhi nahin
'Faraz' jaise koi diyaa turbat-e-havaa chaahe hai
tuu paas aaye to mumkin hai main rahuuN bhi nahin
gile fuzuul the ahad-e-vafaa ke hote hue
gile fuzuul the ahad-e-vafaa ke hote hue
so chup rahaa sitam-e-naaravaa ke hote hue
ye qurbaton mein ajab faasale paDe k mujhe
hai aashnaa ki talab aashnaa ke hote hue
vo hilaagar hain jo majabuuriyaaN shumaar kareN
chiraaG ham ne jalaayeN havaa k hote huye
na kar kisi pe bharosaa ke kashtiyaaN Duubin
Khuda ke hote huye naaKhudaa ke hote huye
kise Khabar hai ki kaasaa-ba-dast phirte hain
bahut se log saron par humaa ke hote hue
'Faraz' aise bhi lamhen kabhi kabhi aaye
ki dil giriftaa rahaa dil_rubaa ke hote hue