gham ki tash.heer na kar,khud ko tamaashaa na bana

[usman_latif_ch]

gham ki tash.heer na kar,khud ko tamaashaa na bana
dekh,is dard-e-muhabbat ko fasaanah na banaa
be samar hi sahi,shaadaabi-e-jaaN ka haiN sabab
khaahishaiN maar ke yooN zaat ko sehraa na banaa
sehn-e-zindaaN maiN bhi aayaiN gi hawaayaiN taazaa
habs lamhoN ko dil-o-jaaN ka labaadah na banaa
waqt badley ga,badaltaa hai,kahaaN ruktaa hai?
hosaley haar ke yooN zeest ko sadmah na banaa
toR hi paaooN issey maiN na nibhaah hi paaooN
mujh se is darjah anokhaa bhi to rishtah na banaa
moj-e-pur shor hawaadis ka pataa deti hai
dekh nadaaN! lab-e-saahil tu gharondhaa na banaa
shokh nazroN se takallum to hai aadat us ki
us ki aadat ko muhabbat ka hawaalah na banaa
jis ke anjaam peh manzil hai na manzil ka nishaaN
aesi be kaar musaafat ko tamannaa na banaa
phoonk Daaley na kaheeN Zain jazeerah dil ka
khaahish-e-lutf-e-muhabbat ko jawaalaa na banaa