دِل کی چوکھٹ جو اِک دیپ جلا رکھا ہے

[Ch|Iftikhar]

دِل کی چوکھٹ جو اِک دیپ جلا رکھا ہے
تِرے لوٹ آنے کا اِمکان سجا رکھا ہے

سانس تک بھی نہیں لیتے ہیں تجھے سوچتے وقت
ہم نے اِس کام کو بھی کل پہ اُٹھا رکھا ہے

رُوٹھ جاتے ہو تو کچھ اور حسیں لگتے ہو
ہم نے یہ سوچھ کے ہی تم کو خفا رکھا ہے

تم جسے رُوٹھا ہوا چھوڑ گئے تھے اِک دِن
ہم نے اُس شام کو سینے سے لگا رکھا ہے

چین لینے نہیں دیتے کسی طور مجھے
تِری یادوں نے جو طُوفان اُٹھا رکھا ہے

جانے والے نے کہا تھا کہ وہ لوٹے گا ضرُور
اِک اِسی آس پہ دروازہ کھلا رکھا ہے

مجھ کو کل شام سے وہ یاد بہت آنے لگا
دِل نے مُدت سے جو اِک شخص بھلا رکھا ہے