Mujhay sab say dilchip baat yeh lagti hay - BZU PAGES: Find Presentations, Reports, Student's Assignments and Daily Discussion; Bahauddin Zakariya University Multan

Mujhay sab say dilchip baat yeh lagti hay · 18-02-2014, 12:12 PM

مجھے سب سے دلچسپ بات یہ لگتی ہے کہ وہ نوجوان جو اپنے فیس بک پیج پر جنیفر لوپنس اور کترینہ کیف کو لائک کرتے ہیں اور انکی ہوشربا تصاویر پر فقرے چست کرتے ہیں ، اپنی پسندیدہ اداکاراؤں کی ایک ایک ادا پر انکی نظر ہوتی ہے ان سب کے ساتھ ہی انہوں نے " آئی لو گرلز ان
حجاب " ٹائپ کا کوئی پیج بھی لائک کیا ہوتا ہے۔

یہ وہ لوگ ہیں جن سے اگر سروے کے دوران پوچھا جائے کہ کیا آپ ملک میں اسلامی نظام کے حامی ہیں تو یہ بڑے زور شور سے سر ہلا کر ہاں میں جواب دیں گے اور اگر وہی نظام انہیں خود پر نافذ کرنے کو کہا جائے تو آئیں بائیں شائیں کریں گے
اصل میں ہم وہ لوگ ہیں جو اپنی گرل فرینڈ کو کرینہ کپور جیسا دیکھنا چاہتے ہیں، یورپی ملک کی شہریت لینا چاہتے ہیں ، دبئی ایئر پورٹ پر اترتے ہی سیدھا کسی نائٹ کلب کا رخ کرتے ہیں ، لاس ویگاس میں جوا کھیلنے کا شوق بھی ہے ، بنکاک میں مساج کروانے کو افضل قرار دیتے ہیں ، امریکہ میں بیٹھ کر ہمیں مذہب کے مروڑ اٹھتے ہیں اور یہ تمام فرائض سر انجام دینے کے بعد ہم پاکستان میں بڑھتی ہوئی فحاشی پر ٹسوے بھی بہاتے ہیں

اصل میں ہم سب لوگ گناہوں میں لتھڑے ہوئے ہیں، ہماری بشری کمزوریاں بھی ہیں اور معاشی مجبوریاں بھی ۔ ہمیں پارسائی کا نشہ بھی چاہئے اور گناہ کی لذت بھی ، ہمارے اندر کا شیطان اس قدر طاقتور ہوچکا ہے کہ وہ ہمیں گناہوں کا جو بھی جواز فراہم کرتا ہے ہم اسے فوراً قبول کر لیتے ہیں ۔ لیکن پھر گناہ کی خلش ہمارا جینا حرام کردیتی ہے ، پیسہ کمانے کے شارٹ کٹ کی طرح ہمیں ثواب کمانے کا بھی شارٹ چاہیئے ، اسی لئے ہم اپنی ذات پراسلام کی اصل روح نافذ کرنے کی بجائے وظیفوں کا شارٹ کٹ اختیار کرتے ہیں، ذخیرہ اندوزی کرنے کے بعد کسی دربار پر دیگیں چڑھاتے ہیں ،یتیم کا مال ہضم کرنے کے بعد حج کرنے چلے جاتے ہیں اور دفاتر میں عورتوں کو ہراساں کرنے کے بعد کانوں کو ہاتھ لگا کر توبہ توبہ کرتے ہوئے کہتے ہیں کہ ہائے ملک میں کتنی فحاشی ہے! آپ اس ملک میں فحاشی کا چھابہ لگا لیں یا فحاشی کے خلاف چھابہ لگالیں ،دونوں طرح کا مال بکےگا ،دونوں شرطیہ مٹھے ہیں!