BZU PAGES: Find Presentations, Reports, Student's Assignments and Daily Discussion; Bahauddin Zakariya University Multan - chaa.Nd ke saath ka

chaa.Nd ke saath ka_ii dard puraane nikale
kitane Gam the jo tere Gam ke bahaane nikale

fasl-e gul aa_ii phir ik baar asiiraan-e-vafaa
apane hii Khuun ke dariyaa me.n nahaane nikale

[asiiraan-e-vafaa = prisoners of faithfulness/fidelity]

hijr ki choT ajab sang-shikan hotii hai
dil kii befaiz zamiino.n se Khazaane nikale

[hijr = separation; sang = stone; shikan = wrinkle/crease/crack]
[befaiz = that which does not yield anything]

umr guzarii hai shab-e-taar me.n aa.Nkhe.n malate
kis ufaq se meraa Khurshiid na jaane nikale

[shab-e-taar = dark night; ufaq = horizon; Khurshiid = sun]

kuu-e-qaatil me.n chale jaise shahiido.n kaa juluus
Khvaab yuu.N bhiigatii aa.Nkho.n ko sajaane nikale

[kuu-e-qaatil = beloved's street; juluus = procession]

dil ne ik ii.nT se taamiir kiyaa taaj mahal
tuu ne ik baat kahii laakh fasaane nikale

[ii.nT = brick; taamiir = (to) construct]

dasht-e tanhaa_ii-e-hijraa.N me.n kha.Daa sochataa huu.N
haaye kyaa log meraa saath nibhaane nikale

[dasht = desert; tanhaa_ii = solitude; hijraa.N = separation]

mai.n ne 'Amjad' use bevaastaa dekhaa hii nahii.n
vo to Khushbuu me.n bhii aahaT ke bahaane nikale

[bevaastaa = without reason]