روایتی اسلامی آرٹ کی جدید تشریح - BZU PAGES: Find Presentations, Reports, Student's Assignments and Daily Discussion; Bahauddin Zakariya University Multan

**Gunjial** · #1 30-09-2010, 10:37 AM

روایتی اسلامی آرٹ کی جدید تشریح

جمیل پرائز کے حتمی مرحلے کے لیے منتخب کیے جانے والے فن پارے روایتی اسلامی آرٹ کا تسلسل ہیں

سعودی عرب کے مدد سے چلنے والے جمیل پرائز کے لیے منتخب شدہ نو فن پاروں کی تمام عرب دنیا میں نمائش کی جائے گی جس سے مختلف ملکوں کے درمیان کلچر کے شعبے میں تعاون کے ساتھ ساتھ روایتی اسلامی آرٹ کی جدید تشریح کرنے میں مدد ملے گی۔
نمائش کا آغاز لندن کے وکٹوریہ اور البرٹ میوزیم میں جولائی میں ہوا تھا اور اب تک ان منتخب فن پاروں کی سعودی عرب اور لبنان نمائش ہو چکی ہے۔ آج کل یہ نمائش متحدہ عرب امارات کے شارجہ میوزیم برائے اسلامی تہذیب میں ہو رہی ہے۔
جمیل پرائز کے حتمی مرحلے کے لیے منتخب کیے جانے والے فن پارے روایتی اسلامی آرٹ کا تسلسل ہیں۔
انعام حاصل کرنے والے فن پارہ ایک ایرانی نژاد فن کار افروز آمیغی نے تخلیق کیا ہے۔ یہ فن پارہ اس مواد سے تیار کیا گیا جسے مہاجرین کے لیے خیمے بنائے جاتے ہیں۔ اس مواد کو ہاتھ سے بہت پیچیدہ انداز میں کاٹا جاتا ہے جس سے کارپٹ ڈیزائن، منی ایچر پینٹنگ اور روایتی فنِ تعمیر کا تاثر ملتا ہے۔

نمائش میں شامل حسن حجاج کا فن پارہ

اگرچہ نمائش میں شامل فن پاروں کی تعداد قلیل ہے لیکن اس کا اثر بہت زیادہ ہے۔
وکٹوریہ اینڈ البرٹ میوزیم میں مڈل ایسٹ کولیکشن کے سینئر کیوریٹر ٹِم سٹینلے کے مطابق جمیل پرائز کا مقصد اس طرح کے طرزِ مصوری کی تخلیق نہیں بلکہ اس کو اجاگر کرنا ہے۔
ان کا کہنا ہے کہ نمائش میں مختلف طرح کے فن پارے شامل ہیں جن کو مختلف ملکوں سے تعلق رکھنے والے فن کاروں نے تخلیق کیا ہے۔
ترکی سے تعلق رکھنے والے مصور سیوان بکاچی کے فن پارے کو بہت پسندیدگی کی نظر سے دیکھا جا رہا ہے۔