BZU PAGES: Find Presentations, Reports, Student's Assignments and Daily Discussion; Bahauddin Zakariya University Multan

Mohabbat ki rangeenian cho'r aa'e
Tere shehar main ik jahan cho'r aa'e

Pahar'ron ki wo mast-o-shadaab wadi
Jahan hum dil-e-naghma' khawan cho'r aa'e

Wo sabza, wo darya, wo pair'ron k saye
Wo geeton bhari bastiaan cho'r aa'e

Haseen Panghto'n ka wo chandi sa panii
Wo Berkha ki rut wo samaan cho'r aa'e

Boht se milay humsafar rastay main
Nahi yaad kis ko kahan cho'r aa'e

Boht dur hum aa gaye us gali sey
Boht dur wo astaa'n cho'r aa'e

Boht mehrbaan thi'n wo gul-posh rahain
Magar hum unhain mehrbaan cho'r aa'e

Bhagolon ki surat yahan phir rahay hain
Nasheeman sar-e-gulista'an cho'r aa'e

Ye Aijaz Hai husn-e-awaargi ka
Jahan bi gaye dastaan cho'r aa'e

Chalay aa'e un rahguzaaron sey Jalib
Magar Hum wahan qalb-o-Jaan Cho'r aa'e