BZU PAGES: Find Presentations, Reports, Student's Assignments and Daily Discussion; Bahauddin Zakariya University Multan

Yeh baat samajh main aaye nahi, aur ammi nay samjhayee nahi
Main kaisay meethi baat karoon, jab meethi cheez khaai nahi

Aapa bhi pakaati hain halwa, woh aakhir kiun halwaayee nahi
Bhayya ki mangni ho gayee hai kal, kiun kal hi dulhan mangwayee nahi
Yeh baat samajh main aayee nahi!!!

Naani k meyaan jab nana hain, Daadi k miyaan jab dada hain
Tab aapi say mainne poocha, "Baji k miyaan kia baaja hain"?
Woh hans hans kar yoon kehnay lagi, aye bhai nahi yoon bhai nahi
Yeh baat samajh main aayee nahi!!!

Jab neya maheena aata hai, bijli ka bill aajata hai
Halankay baadal bechara yeh bijli muft lutaata hai
Phir ham nay apnay ghar bijli, kiun baadal say lagwayee nahi
Yeh baat samajh main aayee nahi!!!

Gar billi sher ki khaala hai, Phir ham nay usay kiun paala hai?
Kia sher buhat naalaaiq hai, khaala ko maar nikaala hai?
Ya jungle k raaja k yahan, kia milti doodh malaayee nahi?
Yeh baat samajh main aayee nahi!!!

Kiun lambay baal hain bhaaloo k, kiun us ki tind karayee nahi?
Kia woh bhi ganda bacha hai, ya us k abbu "BHAI" nahi?
Yeh us ka hair style hai, Ya jungle main koi naayee nahi?
Yeh baat samajh main aayee nahi!!!

Jo taaray jugmug kartay hain, kia un ki chaachi taayee nahi?
Hoga koi rishta sooraj say, yeh baat hamain batlaayee nahi
Par chaand kis ka maamoo hai, Jab maami ka woh bhai nahi?
Yeh baat samajh main aayee nahi!!!

Yeh baat samajh main aayee nahi, aur ammi nay samjhayee nahi
Main kaisay meethi baat karoon, jab meethi cheez khayee nahi