Fast food sust aur shoday loog

[.BZU.]

فاسٹ فوڈ ۔۔۔۔ سُست اور شودے لوگ!
اللہ خوش رکھیں انگریز کو کہ اس نے جدید دنیا کو "فاسٹ فوڈ" نامی خوراک سے متعارف کروایا، یہ اس وقت کی بات ہے جب مغرب خاص طور پر یورپ میں صنعتی انقلاب کی لہر چل رہی تھی، مشینی رفتار سے انسان بھی کام کررہے تھے، ان کے پاس کھانا پکانے اور باقاعدہ دستر خوان لگا کر کھا نے کا وقت نہیں تھا۔۔۔۔۔
آفس کے لئے نکلنے لگے تو بریڈ میں کباب لگایا، انڈا رکھا، چیز یا ماؤنیز کی ایک تہہ لگائی اور آفس پہنچتے پہنچتے کلب سینڈوچ پیٹ میں۔۔ 1950 تک فاسٹ فوڈ باقاعدہ ایک خوارک بن گئی، "کم وقت، فوراًتیار، بھرپور غذائیت / کیلیریز" یہ اس خوراک کا مقصد تھا۔۔۔۔
اور پھر اسے کمرشل کرنے کے لئے، ہمبرگ، ڈرائیو ان، کے ایف سی، سب وے، میکڈونلڈز، پیزا ہٹ اور بھانت بھانت کے دیگر ریسٹورینٹس کھلتے گئے، گورا دفتر سے نکلا، برگر یا پیزا خریدا ،گاڑی چلاتے چلاتے لنچ یا ڈنر کیا، گھر پہنچا، فلم دیکھی یا کتاب پڑھی دارو چڑھائی، زلفِ یار سے چھیڑ چھاڑ کی اور 12 سے پہلے پہلے بستر میں، صبح سے پھر وہ ہی کام کام اور کام۔ ویک اینڈ پر پارٹی، ہلہ گلہ، دارو، کباب شباب، اور پیر سے پھر کام میں دھت۔۔۔۔
اس خوراک کا جنازہ اس وقت نکلا جب یہ پاکستان آئی، پیزا، میکڈونلڈز یا کے ایف سی جانے کے لئے گھر والوں کو یا سنگت کو منانے کا گھنٹہ نہانے دھونے کپڑے استری کرنے اور سرخی پاؤڈر لگانےکے دو گھنٹے۔۔۔۔ اور اگر کوئی مڈل کلاسیا بیچارا پیزا ہٹ جائے تو مڈ نائٹ ڈیل کا انتظار۔۔۔۔۔پہنچتے ہی فیس بک پر اسٹیٹس "فیلنگ ہیپی ایٹ پیزا ہٹ / کے ایف سی / سب وے ودھ فلاں فلاں فلاں" آرڈر آنے کے بعد تصویر، منہ میں ڈالتے ہوئے تصویر، اور پھر خالی پلیٹوں کی تصویر اور ان تصاویر ہر دو دن تک ہا ہا ہی ہی، جانو، لو یو،اکیلے اکیلے کمنٹس میں چوچلے پن۔۔۔ گھر واپسی آدھی رات اور پھر تھک ہار کر سونا صبح آفس کے لئے دیر اور نیند کے جھٹکے الگ۔۔۔۔۔
اور اگر کسی نے خاص مقاصد کے لئے جانا ہو تو پہلے گھر میں "ایکسڑا کلاس کا بہانہ یا آفس میٹنگ کی ٹوپی اور جتنی دیر بیٹھے رہیں یہ ہی ڈر کہ کوئی دیکھ نہ لے۔۔۔ نا کھانے کے پورے نا بیٹھنے کے پورے۔۔
گھنٹوں میں "فاسٹ" فوڈ کھانے والے، پیپسی کے ڈھکن ڈھونڈ کر انعام حاصل کرنے والے اور رمضان دوکان ٹرانسمیشنز میں مسخریاں کر کر اور جو کر بن کر فردوس کی لان اور جامِ شیریں کا گفٹ پیک حاصل کرنے والے ہم بیچارے کہاں انگریز کو پہنچیں گے ؟؟؟ انگریز بھی ہماری ہی طرح حرکتیں کرتا تو آج بھی ہم کوٹری اور سکھر سے دریا کشتی پر پار کر رہے ہوتے، ٹرین کی بجائے (افغانستان کی طرح) ڈاٹسن وین میں بیٹھ کر لاہور جاتے۔۔۔ ایک بجلی ہی تھی جو ہم نے خود بنائی تھی اور وہ ہمارے ساتھ ویسا ہی سلوک کرتی ہے جیسا ہم انگریز کی ایجاد فاسٹ فوڈ کے ساتھ کرتے ہیں۔۔۔
(بے ربط خیالات)