School Bus par firing.. سکول بس پر فائرنگ، چھ ہلاک

[.BZU.]

پاکستان کے صوبہ خیبر پختونخوا کے دارالحکومت پشاور میں پولیس کا کہنا ہے کہ نامعلوم مسلح افراد نے سکول کے بچوں کی ایک بس پر فائرنگ کی ہے جس کے نتیجےمیں پانچ بچے اور بس ڈرائیور ہلاک جبکہ انیس بچے زخمی ہوگئے ہیں۔

مقامی پولیس افسر عبدالقیوم نے بی بی سی کے نامہ نگار دلاورخان وزیر کو بتایا کہ یہ واقعہ منگل کو پشاور شہر سے بیس کلومیٹر دور جنوب کی جانب متنی کے علاقے میں پیش آیا۔
ان کے مطابق نامعلوم مسلح افراد نے سکول کے بچوں کی ایک بس پر فائرنگ کی جس کے نتیجے میں تین بچوں سمیت چار افراد ہلاک جبکہ پانچ زخمی ہوگئے ہیں۔ہلاک ہونے والوں میں بس کا ڈرائیور بھی شامل ہے۔
انہوں نے کہا کہ جس بس پر حملہ ہوا ہے وہ ایک نجی سکول کی بس ہے جو چھٹی کے بعد سکول سے گاؤں کی طرف جا رہی تھی۔
پولیس اہلکار کا کہنا تھا کہ اس واقعہ کے بعد پولیس کی بھاری نفری علاقے میں پہنچ گئی اور راستوں میں ناکے لگا کر ملزمان کی تلاش شروع کر دی تاہم ابھی تک کسی قسم کی گرفتاری عمل میں نہیں آئی ہے۔
انہوں نے کہا کہ فائرنگ کرنے والے مسلح لوگ پیدل تھے یا گاڑی میں ابھی تک معلوم نہیں ہے اور وہ فائرنگ کے بعد فرار ہوگئے ہیں۔
انہوں نے کہا کہ علاقے میں سخت کشیدگی پائی جاتی ہے اور اس واقعہ کے بعد تمام راستے غیر اعلانیہ طور پر بند کر دیےگئے ہیں۔
یاد رہے کہ ضلع پشاور کے مضافاتی علاقے متنی میں گزشتہ ایک عرصے طالبان شدت پسند اور امن کمیٹی کے درمیان ایک دوسرے پر حملوں کا سلسلہ جاری ہے لیکن یہ پہلی دفعہ ہے کہ سکول کے بچوں کی بس کو نشانہ بنایا گیا ہے۔
اس واقعہ سے کچھ عرصہ پہلے قبائلی علاقہ باجوڑ ایجنسی میں سرحد پار سے تحریکِ طالبان پاکستان نے پچیس بچوں کو اغواء کر لیا تھا اور وہ ابھی تک طالبان کے پاس ہیں۔
کلِک’پتہ نہیں چلا ہسپتال کیسے پہنچی‘



بس پر حملے کی اِطلاع ملتے ہی میرے پیروں تلے یوں زمین نکلی کہ مجھے پتہ ہی نہیں چلا کہ میں ہسپتال کب اور کیسے پہنچی۔
یہ الفاظ پشاور کے قریب سکول بس پر ہونے والے حملے میں عمران نامی بچے کی ماں کے ہیں۔ لیکن اس سے بھی زیادہ ہولناک بات یہ ہے کہ عمران کی والدہ اس بات سے فی الوقت بےخبر ہیں کہ اسی حملے میں ان کا دوسرا بیٹا ہلاک ہو گیا ہے۔


انہوں نے لیڈی ریڈنگ ہسپتال میں بی بی سی سے بات کرتے ہوئے کہا ’میرے دو بیٹے ہیں اور میں کالا خیل ہسپتال میں خادمہ ہوں۔ میرا گھر پشاور دلازک روڈ پر واقع ہے اور میرے بچے مقامی خیبر ماڈل سکول میں آٹھویں اور نویں جماعت میں پڑھتے ہیں۔‘
ان کا کہنا تھا ’ایک بجے جب میں ڈیوٹی سے گھر واپس پہنچی تو مجھے معلوم ہوا کہ بچے اب تک گھر نہیں پہنچے اور اسی دوران میرے داماد نے مجھے ٹیلیفون پر بتایا کہ سکول کی بس پر فائرنگ ہوئی ہے۔‘
انھوں نے کہا ’بس اس کے بعد مجھے نہیں معلوم میں کس طرح ہسپتال پہنچی۔‘
ان کا کہنا تھا کہ ان کے دوسرے بیٹے کا نام سلمان ہے اور انھیں نہیں معلوم کہ وہ زندہ ہے بھی یا نہیں۔ اس خاتون کے ایک قریبی رشتہ دار نے بتایا کہ سلمان موقع ہی پر ہلاک ہوگیا تھا لیکن اب وہ سوچ رہے ہیں کہ ان کو یہ کیسے بتایا جائے۔
اسی طری چھٹی جماعت کے طالبِ علم حامد نے بتایا کہ ان کو کچھ پتہ نہیں حملہ کیسے ہوا اور کس نے کیا۔ تاہم انہوں نے فائرنگ کی آواز سُنی اور انھیں گولیاں لگنے کے بعد ہسپتال میں ہوش آیا۔
ایک اور طالبِ علم شمس اللہ نے بتایا کہ انھیں بھی کچھ پتہ نہیں کہ فائرنگ کب شروع ہوئی تاہم انھوں نے بس سے اُتر کر زخمی حالت میں بھاگنے کی کوشش کی اور بعد میں کسی نے انھیں ہسپتال پہنچا دیا۔
شمس اللہ کے اٹھارہ سالہ بڑے بھائی رب نواز نے بتایا کہ وہ حملے کے دوران پشاور میں تھے اور کسی نے ان کو ٹیلیفون کر کے بتایا کہ سکول بس پر حملہ ہوا ہے۔
رب نواز کا کہنا تھا کہ یہ سنتے ہی وہ فوراً ہسپتال پہنچ گئے لیکن ان کی حالت اس قدر غیر ہوگئی تھی کہ انھیں کچھ معلوم نہیں کہ وہ ہسپتال کیسے پہنچے۔